مهرج يهرج كسير الفؤاد بقلم / الشاعر القدير / يحيي ابراهيم محمد

مهرج يهرج كسير الفؤاد 
ورغم المشقه ورغم العناد 
لازم يضحك جميع العباد
يضحك ويبكي في نفس الميعاد 
مهرج في وشه ميت الف لون
بيحبس دموعه جوه العيون
شمعه تقدم جميع الفنون
وتفني حياتها في ضحكه مجون
ويضحك وقلبي ماليه الشجون 
مهرج يهرج همومنا 
يفرج مهرج وطيب حنين عطوف 
ع الحبل يمشي بدون أي خوف 
يضحك بحركه شفايفه الوف 
ويلبس مهرول مبهدل كمان
شفايفه بتعزف تقولش الكمان
لما تشوفه تصقف كفوف
يعدل ويقلب جميع الحروف 
مهرج تشوفه بوجهه البشوش 
ملون عيونه ووجهه برتوش 
حتي سنانه وحتي الرموش
بيته في سيركه وغيره ما لوش
تسعد حياته ضحكه صبيه 
ويمسح دموعه يلاغي الشقيه 
اشوفه ليلاتي يصعب عليه
بلياتشو فاهم ويعمل عبيط 
ورغم سنينه العديده نشيط 
ورغم همومه الكتيره وقهره 
طيب ولكن بيعمل حويط 
لو ساب دموعه تملا المحيط
مهرج يهرج كسير الفؤاد
ورغم المشقه ورغم العناد 
لازم يضحك جميع العباد